Os ydych chi wedi bod yn meddwl sut mae maethu a mabwysiadu yn gweithio, byddem wrth ein bodd yn eich helpu i ddeall beth yw’r posibiliadau, heb roi pwysau arnoch chi.
Ers dros 150 o flynyddoedd, rydyn ni wedi bod yn helpu plant i ddod o hyd i gartrefi cariadus ac rydyn ni’n dal i wneud hynny heddiw. Rydyn ni’n gweithio'n agos gydag awdurdodau lleol i ddod o hyd i gartrefi diogel a gofalgar i blant sydd eu hangen, drwy faethu a mabwysiadu. Mae ein timau ymroddedig yn tywys teuluoedd drwy bob cam o'r broses, gan gynnig cyngor arbenigol, cymorth ymarferol, a hyfforddiant parhaus i helpu gofalwyr maeth a rhieni sy’n mabwysiadu i deimlo'n hyderus a'u bod yn cael eu cefnogi ar eu taith.
Mae pob teulu'n wahanol, ac mae sawl ffordd o agor eich calon, a'ch cartref, i blentyn. Gall maethu a mabwysiadu fod yn werth chweil, gan gynnig amgylchedd diogel a chariadus i blant pan fydd ei angen arnyn nhw fwyaf. Mae penderfynu gwneud y naill neu'r llall yn benderfyniad mawr, ond gall newid cynifer o fywydau, gan gynnwys eich bywyd chi, er gwell.
Beth yw’r gwahaniaeth rhwng maethu a mabwysiadu?
Mae maethu'n darparu cartref dros dro i blentyn nad yw ei deulu biolegol yn gallu gofalu amdano ar hyn o bryd. Gallai fod yn y tymor byr neu yn y tymor hir. Mae gofalwyr maeth yn chwarae rhan hollbwysig yn y gwaith o helpu plant i deimlo'n ddiogel, eu bod yn cael eu cefnogi a'u gwerthfawrogi.
Mae mabwysiadu yn drefniant cyfreithiol mwy parhaol. Pan fyddwch yn mabwysiadu plentyn, byddwch yn dod yn rhiant cyfreithiol iddo gyda'r holl hawliau a chyfrifoldebau a ddaw yn ei sgil. Rydych yn cynnig teulu am oes iddo, yn ogystal â chartref.
Mae rhagor o wybodaeth am y gwahaniaethau rhwng maethu a mabwysiadu ar gael yma.
Ai maethu neu fabwysiadu sy’n iawn i mi?
Does dim rhaid i chi fod yn berffaith. Dim ond yn amyneddgar, yn garedig, ac yn barod i wrando. Mae gofalwyr maeth a rhieni sy’n mabwysiadu yn dod o bob math o gefndiroedd - pobl sengl, pobl sy’n briod, pobl â ffydd, pobl sy’n rhan o'r gymuned LHDT+, pobl sydd â phlant yn barod neu bobl heb blant.
Os oes gennych chi le yn eich cartref a lle yn eich calon, efallai y bydd yn rhywbeth gwerth ei ystyried. Mae'n iawn cymryd eich amser, gofyn cwestiynau, a phenderfynu beth sy'n iawn i chi a'ch teulu.
O blant bach i bobl ifanc yn eu harddegau: sut gallwch chi annog noson dda o gwsg
Mae cael digon o gwsg yn hanfodol i iechyd, hwyliau a datblygiad eich plentyn, p’un a yw’n blentyn bach neu’n berson ifanc yn ei arddegau. Mae pob plentyn yn wahanol, ond mae pethau y gallwch chi eu gwneud i helpu eich plentyn (a chithau!) i gysgu’n well.
Datblygu ymennydd iach
P’un a yw eich plentyn yn fabi neu yn ei arddegau, gallwch helpu ei ymennydd i ddatblygu a gweithredu ar ei orau. Rydyn ni wedi ymuno â KCA, arbenigwyr niwrowyddoniaeth, i rannu dull syml ac effeithiol y gallwch ddechrau ei ddefnyddio heddiw.