O weithwyr gofalu proffesiynol i ofalwyr maeth: Sut mae Brian a Helen yn newid bywydau

Cafodd Brian yrfa hir yn cefnogi plant ac oedolion mewn cartrefi preswyl, yn ogystal â gweithio gyda phobl ifanc sydd wedi camddefnyddio sylweddau ac alcohol. Mae Helen yn gweithio yn y sector meithrinfeydd ac yn ystod ei gyrfa mae wedi cefnogi plant bach y nodwyd eu bod mewn perygl o niwed sylweddol. Oherwydd eu profiad, maent wedi gallu maethu nifer o blant ag anghenion cymhleth ac er ei fod yn waith heriol, maent wedi’i gael yn werth chweil.

“Maen nhw’n gallu cyrraedd ar bigau’r drain ac efallai eu bod wedi diflannu i mewn iddyn nhw eu hunain. Efallai eu bod yn llawer iau yn emosiynol na’u gwir oed” meddai Brian. “Rydyn ni’n ceisio creu awyrgylch tawel a thros amser yn meithrin perthynas ac yn datblygu ymddiriedaeth. Mae terfynau’n cael eu gosod a’u profi, ac rydyn ni’n darparu modelau rôl o sut i ymddwyn.”

Mae gan y cwpl ddau fab sy’n oedolion a dau o wyrion eu hunain ac fe wnaethant feddwl am fod yn ofalwyr maeth tymor byr i ddechrau (a elwid gynt yn ofal seibiant), ond fe wnaethom ni eu cefnogi i ystyried gofal maeth tymor hir ac nid ydynt wedi edrych yn ôl. Dysgwch fwy am sut y byddwn ni’n eich cefnogi chi os byddwch chi’n maethu gyda ni.

Ar ôl asesiad trylwyr, cawsant hyfforddiant ac maent yn dal i gael cefnogaeth barhaus gan staff Barnardo’s a rhieni maeth eraill yn eu rhwydwaith cefnogi.

“Mae Barnardo’s yn wych am baru’r plentyn iawn â’r teulu maeth iawn, wnân nhw ddim rhoi gormod o lwyth ar eich ysgwyddau. Maen nhw’n cyfateb yn gyfrifol ac rydych chi’n cael cefnogaeth anhygoel gan weithiwr cymdeithasol a rhieni maeth eraill,” meddai Brian. “Rydw i wedi cael cyfle i wneud llawer o hyfforddiant, popeth o lythrennedd emosiynol ac iaith a lleferydd i ddiogelu a chymorth cyntaf, ac mae’n sicr yn helpu.”

Mae Brian a Helen yn pwysleisio’r angen i fod yn amyneddgar a deall yr hyn y gallai plentyn sy’n cael ei faethu, a’i deulu biolegol, fod wedi’i ddioddef. “Mae angen i chi beidio â barnu’r plentyn na’i deulu. Rydyn ni’n gweithio ar ddatblygu perthynas dda gyda’r teuluoedd sy’n aml yn teimlo’n euog iawn ar ôl colli plentyn i ofal.”

Ychwanega Helen, “Mae angen i chi fod yn amyneddgar ac yn wydn. Pan fydd plentyn yn ymateb oherwydd y trawma y mae wedi bod drwyddo, allwch chi ddim ei gymryd yn bersonol, mae’n rhaid i chi ddatgysylltu eich hun a deall bod ei ymddygiad yn ganlyniad i’r trawma hwnnw, allwch chi ddim ei farnu am hynny.”

Roedd y cwpl eisiau gwneud gwahaniaeth cadarnhaol i fywydau plant a thrwy faethu maen nhw’n cael cyfle i weld plant a phobl ifanc yn ffynnu yn eu gofal. ​​​​​​

Ychwanega Helen, “Pan fydd plentyn yn dechrau datblygu hunan-barch, hyder a gwytnwch cadarn, mae ein hunan-barch ni ein hunain yn cynyddu hefyd. Mae gweld newid cadarnhaol yn eu gallu i ddelio â’u hemosiynau yn rhoi boddhad mawr. Credwn y gellir trawsnewid bywydau plant drwy roi cariad diamod iddynt.”

Os ydych chi’n meddwl y gallech chi newid bywyd plentyn drwy faethu, yn union fel mae Brian a Helen wedi’i wneud, byddem wrth ein bodd yn eich cefnogi chi. Cysylltwch â ni heddiw a threfnu sgwrs heb bwysau gydag aelod o’n tîm cyfeillgar.